میزان بینک نے اپنے ’میزان سولر پروگرام’ کے تحت ایک نیا سولر پینل فنانسنگ حل متعارف کرایا ہے، جس کا مقصد صارفین کو صاف اور قابل تجدید توانائی کی طرف منتقل ہونے میں معاونت فراہم کرنا ہے۔
میڈیا رپورٹس کے مطابق یہ اسکیم اسلامی مالیاتی اصولوں کے تحت تیار کی گئی ہے، جو صارفین کو بغیر کسی ابتدائی رقم کے سولر پینلز نصب کروانے کی سہولت دیتی ہے، اور طویل مدتی بچت کا موقع فراہم کرتی ہے۔
سولر فنانسنگ کا طریقہ کار
میزان بینک نے اپنے منظور شدہ وینڈرز کے نیٹ ورک کے ذریعے صارفین کو سولر فنانسنگ حاصل کرنے میں مدد کے لیے 8 مراحل پر مشتمل طریقہ کار ترتیب دیا ہے۔
’درخواست کی تیاری‘
پہلے مرحلے میں صارف میزان بینک کی ویب سائٹ یا برانچ سے معلومات حاصل کرنے کے بعد سولر پینل لگوانے کے لیے درخواست جمع کرائے گا۔
’سائٹ کا جائزہ‘
منظور شدہ وینڈر صارف کے گھر کا معائنہ کرتا ہے تاکہ اندازہ لگایا جا سکے کہ کتنی بجلی درکار ہے اور کون سا سولر سسٹم مناسب ہوگا۔
’تکنیکی تجزیہ‘
اس کے بعد وینڈر سسٹم کی تفصیلات اور تخمینہ جات کے ساتھ تجزیہ مکمل کرتا ہے۔
’بینک کی منظوری‘
یہ تمام مراحل مکمل ہونے کے بعد بینک کی جانب سے فنانسنگ کی منظوری دی جاتی ہے۔
معاہدہ
اس کے بعد صارف اور بینک کے درمیان اسلامی مالیاتی اصولوں کے مطابق معاہدہ طے پاتا ہے۔ اور منظور شدہ وینڈر سولر سسٹم نصب کرتا ہے۔
’معائنہ اور تصدیق‘
سولر سسٹم کی تنصیب کے بعد ذمہ داران کی جانب سے اس کا جائزہ لیا جاتا ہے تاکہ یہ یقینی بنایا جا سکے کہ سب کچھ معیار کے مطابق ہے۔
’قسطوں کی ادائیگی‘
سولر پینل کی تنصیب کے بعد صارف مقررہ مدت میں آسان اقساط کے ذریعے ادائیگی کرتا ہے۔
یہ پروگرام خاص طور پر ان افراد اور گھرانوں کے لیے موزوں ہے جو بڑھتے ہوئے بجلی کے نرخوں سے پریشان ہیں اور ماحول دوست توانائی کی جانب قدم بڑھانا چاہتے ہیں، لیکن ابتدائی لاگت ان کے لیے رکاوٹ بنتی ہے۔