بالی ووڈ کی پاکستان مخالف فلم دھریندر کو خلیجی تعاون کونسل کے تمام ممالک میں باقاعدہ طور پر بین کر دیا گیا ہے۔ رپورٹ کے مطابق بھارتی فلم دھریندر پر متحدہ عرب امارات، سعودی عرب، بحرین، کویت، عمان اور قطر میں مکمل پابندی عائد کی گئی ہے۔ یہ پابندی فلم کے مبینہ پاکستان مخالف موضوعات اور ایسے مناظر کی وجہ سے لگائی گئی ہے جنہیں خطے کے لیے سیاسی اور ثقافتی طور پر حساس سمجھا جا رہا ہے۔ خلیجی ممالک کے پاکستان کے ساتھ قریبی تعلقات اور وہاں مقیم بڑی پاکستانی آبادی کے باعث ایسے مواد پر خصوصی نظر رکھی جاتی ہے، اور اس سے قبل بھی کئی ایسی فلموں کو مشکلات کا سامنا کرنا پڑا ہے جن میں سخت یا اشتعال انگیز مواد شامل ہو۔
ہدایتکار آدتیہ دھر کی فلم دھریندر میں رنویر سنگھ، اکشے کھنہ، سنجے دت، آر۔ مادھون اور ارجن رامپال شامل ہیں۔ فلم کی کہانی 1999 کے طیارہ اغوا، 2014 کے پارلیمنٹ حملے اور مختلف سیاسی حالات سے متاثر ہے، جس میں پاکستان کے انڈر ورلڈ سے جڑے کرداروں کا حوالہ دیا گیا ہے، جو خلیجی سنسر بورڈز کے لیے قابل اعتراض ثابت ہوا۔ فلم 5 دسمبر 2025 کو ریلیز ہوئی اور اب تک بھارت میں 6 دنوں کے دوران 188.60 کروڑ جبکہ بیرونِ ملک 4 دنوں میں 44.08 کروڑ کمائے ہیں۔ تاہم خلیجی ممالک میں پابندی کے باعث فلم کی ممکنہ کمائی کو نمایاں نقصان پہنچ سکتا ہے، کیونکہ یہ خطہ بالی ووڈ فلموں کے لیے ایک بڑی مارکیٹ سمجھا جاتا ہے۔
