دبئی متحدہ عرب امارات میں عرصہ دراز سے کام کرنے والی دو پاکستانی صحافتی تنظیموں پا کستان جرنلسٹس فورم (PJF ) اور پاکستان فیڈرل یونین آف جرنلسٹس (PFUJ) نے متحدہ عرب امارات کا 54 واں “عید الاتحاد “پاکستان ایسوسی ایشن دبئی میں منایا-
عید الاتحاد کی تقریب میں قونصلیٹ سٹاف، پاکستان ایسوسی ایشن دبئی کے ارکان، بزنس مینوں، پاکستانی کمیونٹی کے لوگوں اور صحافیوں نے شرکت کی- تقریب میں شرکت کرنے والوں میں قونصلیٹ جنرل آف پاکستان دبئی سے قونصلر جام عبداللہ، پاکستان ایسوسی ایشن دبئی سے نعیم رسول، داؤد شریف، پاکستان فیڈرل یونین آف جرنلسٹس (PFUJ) کے فاؤنڈر سید مدثر خوشنود، صدر خالد ملک، جنرل سیکرٹری انصر اکرم، پا کستان جرنلسٹس فورم (PJF ) کے صدر طاہر منیر طاہر، سینئر نائب صدر سعدیہ عباسی، مظفر رضوی، اشفاق احمد (ARY)، پاکستانی بزنس کمیونٹی سے چودھری محمد اشرف گل، ذوالفقار علی مغل ، طلحہ اور کمیونٹی کے دیگر لوگوں نے شرکت کی-
تقریب میں شامل متذکرہ شرکاء نے متحدہ عرب امارات کے 54 ویں “عید الاتحاد ” کی مناسبت سے تقاریر کیں اور اپنے اپنے خیالات کا اظہار کیا-مقررین نے کہا کہ متحدہ عرب امارات اور پاکستان کے آپسی تعلقات دیرینہ اور مضبوط ہیں جن میں روز بروز پائیداری اور مزید مضبوطی آ رہی ہے- ہم حکومت امارات کے شکر گزا ر ہیں کہ جنہوں نے ہمیں یہاں کام کرنے کا پر سکون اور محفوظ ماحول فراہم کیا- مقررین نے اما رات میں مقیم پاکستانیوں سے کہا کہ وہ میزبان ملک میں رہتے ھوئے اس ملک کے قوانین کی پاسداری کریں اور ایک ذمہ دار شہری ہونے کا مظاہر ہ کریں-
دوران تقریب پاکستان فیڈرل یونین آف جرنلسٹس (PFUJ) کے صدر خالد ملک کو خلیج ٹائمز میں مسلسل 47 سال صحافتی خدمات انجام دینے پر اعزازی شیلڈ دی گئی- شرکائے تقریب نے خالد ملک کو مبارکباد پیش کی اور اعزازی شیلڈ دینے پر پا کستان جرنلسٹس فورم (PJF ) کا شکریہ ادا کیا -اس موقع پر خالد ملک،سید مدثر خوشنود اور انصر اکرم نے کہا کہ امارات کے 54 ویں “عید الاتحاد ” کے موقع پر دو صحافتی تنظیموں نے مل کر اس جشن کو منا کر اس بات کا ثبوت دیا ہے کہ امارات میں کام کرنے والے صحافی مثبت اور متحد ہیں- ہم آئندہ بھی مختلف تقریبات ایک پلیٹ فارم سے مل کر منائیں گے تا کہ آپسی اتحاد کو فروغ ملے-
“عید الاتحاد ” کے موقع پر تقریب میں شریک تمام لوگوں نے مل کر کیک کاٹا، خوشی کا اظہار کیا، امارات کے شہریوں اور حکمرانوں کے لئے دعائے خیر اور پاکستان و امارات کے ما بین تعلقات کی خوشگواری کے لیے دعا کی-
