ویڈیو شیئرنگ کی مقبول ایپ ٹک ٹاک نے سال 2025 کی دوسری سہ ماہی (اپریل تا جون) کے دوران پاکستان میں کمیونٹی گائیڈ لائنز کی خلاف ورزی پر ڈھائی کروڑ سے زائد ویڈیوز ڈیلیٹ کردیں۔
یہ انکشاف ٹک ٹاک کی جانب سے پیر کے روز کمیونٹی گائیڈ لائنز انفورسمنٹ رپورٹ میں کیا گیا۔
ٹک ٹاک نے بیان میں کہا گیا کہ پاکستان میں کمیونٹی گائیڈ لائنز کی خلاف ورزی پر کل 25،448،992 ویڈیوز کو ہٹایا گیا۔
رپورٹ کے مطابق99.7 فیصد ویڈیوز از خود (پروایکٹیولی) حذف کی گئیں جبکہ96.2 فیصد ویڈیوز پوسٹ ہونے کے 24 گھنٹوں کے اندر ہٹائی گئیں۔
پاکستان میں ٹک ٹاک پر متعدد بار پابندی
یاد رہے کہ پاکستان ٹیلی کمیونیکیشن اتھارٹی (پی ٹی اے) کی جانب سے ٹک ٹاک پر غیراخلاقی اور غیر مہذب مواد کی شکایات پر متعدد مرتبہ پابندیاں عائد کی جا چکی ہیں۔
پہلی بار اکتوبر 2020 میں ٹک ٹاک پر پابندی لگائی گئی تھی جو کمپنی کی یقین دہانی کے بعد 10 روز میں ختم کر دی گئی تھی۔
عالمی اعداد و شمار بھی جاری
ٹک ٹاک کے مطابق دنیا بھر میں 18 کروڑ 90 لاکھ ویڈیوز کو حذف کیا گیا جو پلیٹ فارم پر اپلوڈ کی گئی تمام ویڈیوز کا 0.7 فیصد بنتا ہے۔
ان میں سے163،962،241 ویڈیوز خودکار نظام کے ذریعے ہٹائی گئیں۔ 7،457،309 ویڈیوز بعد ازاں نظرثانی کے بعد بحال کی گئیں۔
رپورٹ میں مزید کہا گیا کہ99.1 فیصد ویڈیوز کو از خود ہٹایا گیا،94.4 فیصد ویڈیوز کو 24 گھنٹوں کے اندر حذف کیا گیا۔
جعلی اکاؤنٹس اور کم عمر صارفین کا خاتمہ
ٹک ٹاک کے مطابق7 کروڑ 69 لاکھ 91 ہزار 660 جعلی اکاؤنٹس حذف کیے گئے۔
2 کروڑ 59 لاکھ 4 ہزار 708 ایسے اکاؤنٹس بھی بند کیے گئے جن کے صارفین کی عمر 13 سال سے کم ہونے کا شبہ تھا۔
حذف شدہ ویڈیوز کی نوعیت
ٹک ٹاک کی رپورٹ کے مطابق حذف کی گئی ویڈیوز کی مختلف نوعیت کی تھیں جن میں سے تقریباً 30.6 فیصد حساس یا بالغ تھیمز پر مبنی تھیں جو پلیٹ فارم کی مواد کی پالیسیوں کے خلاف تھیں۔
اس کے علاوہ 14 فیصد ویڈیوز نے حفاظتی اور اخلاقی معیار کی خلاف ورزی کی جبکہ 6.1 فیصد ویڈیوز نے پرائیویسی اور سیکیورٹی قوانین کی خلاف ورزی کی۔
اس کے علاوہ تقریباً 45 فیصد ویڈیوز کو جھوٹی معلومات پھیلانے کے الزام میں ہٹایا گیا اور 23.8 فیصد ویڈیوز ایسے تھیں جو ترمیم شدہ یا مصنوعی ذہانت (اے آئی) سے تیار کردہ مواد پر مشتمل تھیں۔
پاکستان میں گزشتہ سہ ماہی کی کارکردگی
2025 کی پہلی سہ ماہی (جنوری تا مارچ) میں ٹک ٹاک نے پاکستان میں 24,954,128 ویڈیوز حذف کی تھیں۔
یعنی اپریل سے جون کے درمیان ہٹائی گئی ویڈیوز کی تعداد میں تقریباً 5 لاکھ کا اضافہ دیکھنے میں آیا۔
