جنگ بندی کے اعلان کے باوجود بھارتی فورسز کی جانب سے لائن آف کنٹرول پر ضلع بھمبر کے مختلف علاقوں میں بلااشتعال فائرنگ اور گولہ باری کا سلسلہ جاری ہے۔
10 مئی کو ہوانے والی فائرنگ میں برنالہ سیکٹر میں 6 شہری شہید جبکہ 19 زخمی ہوگئے۔
بھارت کی بلا اشتعال فائرنگ سے سب سے زیادہ تھب، موئیل اور دھینگا نوالی کے علاقے متاثر ہوئے۔
فائرنگ کے نتیجے میں ہونے والے شہدا میں شمیم زوجہ اقبال (بانیاں)، جنید اقبال (بانیاں)، نبیل ولد نوید (تھب)، اللہ لوک ولد حاجی محمد (جھنڈا)، اعتزاز شاہ ولد مہدی شاہ (بانیاں) اور مون شاہ ولد مہدی شاہ (بانیاں) شامل ہیں۔
بھارتی فوج کی فائرنگ سے 19 شہری زخمی بھی ہوئے جن میں خواتین اور بچے بھی شامل ہیں۔
بیشتر زخمیوں کا تعلق تھب، موئیل اور دھینگا نوالی سے ہے، فائرنگ کے نتیجے میں علاقے میں بھاری مالی نقصانات بھی ہوئے ہیں۔
باغسر سیکٹر میں بھارتی فورسز کی سرحد پار سے فائرنگ سے کئی مویشی بھی ہلاک ہوئے۔
