میٹا کے چیف ایگزیکٹو مارک زکربرگ نے کہا کہ ٹک ٹاک کی کامیابی ان کی کمپنی کے لیے خطرہ ہے۔
غیر ملکی خبر رساں ایجنسی کے مطابق مارک زکربرگ نے ایک مقدمے کی سماعت کے دوران کہا کہ ٹک ٹاک کی موجودگی 2018 سے میٹا کی توجہ کا مرکز بنی ہوئی ہے۔ ٹک ٹاک کی مقبولیت سے میٹا پر براہ راست اثرات مرتب ہوتے ہیں۔
انہوں نے اعتراف کیا کہ ٹک ٹاک کے باعث ہماری کمپنی کی شرح نمو ڈرامائی حد تک سست ہوئی ہے۔ بائیٹ ڈانس کی ایپ ہماری اولین ترجیح ہے اور سوشل میڈیا پلیٹ فارمز کے لیے بہت بڑا مسابقتی خطرہ ہے۔
مارک زکربرگ نے کہا کہ ٹک ٹاک بدستور میٹا کے لیے باعث تشویش ہے اور گزشتہ چند برسوں کے دوران ہم نے اپنی مسابقت کو برقرار رکھا ہے۔
انہوں نے کہا کہ ٹک ٹاک اس وقت تیزی سے ابھرنا شروع ہوئی جب بائیٹ ڈانس نے 2017 میں میوزیکلی نامی ایپ کو خریدا۔ اور اسے 2018 میں ٹک ٹاک کے ساتھ ملا دیا۔
میٹا کے چیف ایگزیکٹیو نے کہا کہ اس کے فوری بعد میٹا کی جانب سے فیس بک کے انفرادی صارفین کی تعداد کو رپورٹ کرنا ختم کر دیا گیا۔ اور تمام ایپس جیسے انسٹا گرام اور واٹس ایپ کے صارفین کی مشترکہ تعداد کو بتانا شروع کیا۔ اور اس تبدیلی کو فیس بک کی سست شرح نمو کو چھپانے کی حکمت عملی تصور کیا جاتا ہے۔
