فیڈرل بورڈ آف ریونیو (ایف بی آر) نے فروری 2025 کے لیے سیلز ٹیکس اور فیڈرل ایکسائز ریٹرن جمع کرانے کی تاریخ بڑھا دی۔
اس حوالے سے ایف بی آر نے ان لینڈ ریونیو کے چیف کمشنرز، بڑے ٹیکس دہندگان کے دفاتر (ایل ٹی اوز)، درمیانے ٹیکس دہندگان کے دفتر (ایم ٹی او)، کارپوریٹ ٹیکس دفاتر (سی ٹی اوز) اور علاقائی ٹیکس دفاتر (آر ٹی اوز) کو ہدایات جاری کردی گئی ہیں۔
ایف بی آر کی پیر کو جاری کردہ ہدایات کے مطابق سیلز ٹیکس ایکٹ 1990 کے سیکشن 74 اور فیڈرل ایکسائز ایکٹ 2005 کے سیکشن 43 کے تحت حاصل اختیارات استعمال کرتے ہوئے فروری 2025 کے ٹیکس دورانیے کے لیے سیلز ٹیکس اور فیڈرل ایکسائز ریٹرن جمع کرانے کی تاریخ جو پہلے 18 مارچ 2025 مقرر تھی اب 27 مارچ 2025 تک بڑھا دی گئی ہے۔
ٹیکس ماہرین کا کہنا ہے کہ اس طرح کی توسیع عام طور پر تکنیکی یا طریقہ کار میں تاخیر کا سامنا کرنے والے کاروباری اداروں کی درخواستوں کے جواب میں دی جاتی ہے۔
ایف بی آر نے ٹیکس دہندگان پر زور دیا ہے کہ وہ جرمانے سے بچنے اور اپنے ریٹرن کی ہموار پروسیسنگ کو یقینی بنانے کے لیے نئی ڈیڈ لائن کو پورا کریں۔
