وفاق ایوان ہائے صنعت و تجارت نے آئندہ بجٹ کے لیے ٹیرف تجاویز وزارت تجارت کو بھیج دیں، چائے کی درآمد پر کسٹم ڈیوٹی گیارہ فیصد سے کم کرکے پانچ فیصد کرنے، طبی آلات اور ادویہ سازی کے خام مال پر کسٹم ڈیوٹی میں کمی کی تجویز دی گئی ہے۔
صدر ایف پی سی سی آئی عاطف اکرام شیخ کے مطابق ٹیرف تجاویز میں کسٹم ڈیوٹی کو بیس فیصد کے بجائے پانچ اور چھ فیصد کرنے جبکہ ایڈیشنل کسٹم ڈیوٹی کو مکمل ختم کرنے کی سفارش کی گئی ہے۔ ان کا کہنا تھا کہ خام مال پر درآمدی ڈیوٹی کم ہونے سے مقامی سطح پر ادویات کی پیداوار میں اضافہ ہوگا۔
موٹر سائیکل کے پرزوں پر کسٹم ڈیوٹی پینتیس فیصد سے کم کرکے بیس فیصد کرنے کی سفارش کی گئی ہے، جبکہ اسپیئر پارٹس کی قیمتوں میں کمی سے حکومتی ریونیو میں اضافے کا امکان ظاہر کیا گیا ہے۔ کاغذ اور پیپر بورڈ پر کسٹم ڈیوٹی دس فیصد برقرار رکھنے کی تجویز دی گئی تاہم ریٹیل ڈیوٹی ختم کرنے کا مطالبہ کیا گیا۔
ایف پی سی سی آئی نے پرنٹڈ میٹریل کی درآمد پر کسٹم ڈیوٹی تین فیصد سے بڑھا کر بیس فیصد کرنے کی سفارش کی ہے۔ صدر عاطف اکرام شیخ کے مطابق ہر سال چار ارب روپے کا پرنٹڈ میٹریل درآمد کیا جاتا ہے جو مقامی سطح پر تیار ہوسکتا ہے۔ایوان صنعت و تجارت نے پانچ سال پرانی تعمیراتی مشینری کی درآمد پر عائد پابندی ختم کرنے اور دس سال تک پرانی تعمیراتی مشینری درآمد کرنے کی اجازت دینے کی بھی تجویز دی ہے۔
