انٹرنیشنل کرکٹ کونسل (آئی سی سی) نے چیمپئنز ٹرافی میں بھارت اور بنگلہ دیش کے میچ کے بروڈکاسٹ میں ایونٹ لوگو پر پاکستان کا نام نہ ہونے پر اپنی غلطی تسلیم کرلی۔
جمعرات کو ہونے والے بھارت اور بنگلادیش کے چیمپیئنز ٹرافی میچ کے بروڈکاسٹ میں ایونٹ لوگو پر پاکستان کا نام نہیں لکھا گیا تھا جس پر شائقین سوال اٹھا رہے تھے۔ نیوزی لینڈ اور پاکستان کے مابین گزشتہ روز ہونے والے افتتاحی میچ کے بروڈکاسٹ میں لوگو پر پاکستان درج تھا۔
آئی سی سی کے ترجمان کا کہنا ہے کہ گرافکس کی غلطی تکنیکی وجہ سے ہوئی جو درست کرلی جائے گی۔ ترجمان نے بتایا کہ میچ کے دوران اس لوگو کو تبدیل کرنا ممکن نہیں تھا۔
واضح رہے کہ آئی سی سی کے سوشل میڈیا اکاؤنٹس پر میچ کے کلپس پر لوگو میں پاکستان کا نام موجود ہے۔
