راولپنڈی ٹیسٹ میں انگلینڈ کو بآسانی 9 وکٹوں سے ہرا کر پاکستان نے 4 سال بعد اپنی سرزمین پر پہلی ٹیسٹ سیریز جیت لی۔3 ٹیسٹ میچوں کی سیریز میں مہمان ٹیم انگلینڈ کو 1-2 سے شکست کا سامنا کرنا پڑا ہے۔ پاکستانی اسپنرز نے فیصلہ کن ٹیسٹ میچ کے تیسرے روز بھی اپنا سکہ جمائے رکھا۔ نعمان علی نے 6 جبکہ ساجد خان نے 4 وکٹیں لیتے ہوئے انگلینڈ کی پوری ٹیم کو دوسری اننگز میں 112 رنز پر آؤٹ کردیا۔
4 سال بعد ہوم سیریز میں کامیابی پر جہاں شائقین کرکٹ اور سابق کھلاڑیوں نے پاکستان کرکٹ ٹیم کو سراہتے ہوئے سوشل میڈیا پر مختلف پیغامات لکھے وہیں پاکستان کرکٹ ٹیم کے سابق چیئر مین اور کھلاڑی رمیز راجہ اس وقت موضوع بحث بن چکے ہیں۔
ہوا کچھ یوں کہ ٹیسٹ میچ کے بعد پاکستان ٹیسٹ کرکٹ ٹیم کے کپتان شان مسعود اور رمیز راجہ کی گفتگو کا ایک ویڈیو کلپ سماجی رابطے کی ویب سائٹ پر وائرل ہورہا ہے جس میں میزبان زینب عباس شان مسعود سے کہتی ہیں کہ یہ جیت آپ کے لیے خوش آئند ہوگی کیونکہ 6میچز ہارنے کے بعد ملی ہے۔ جس پر رمیز راجہ طنزیہ انداز میں پوچھتے ہیں کہ ویسے یہ آپ نے کیسے کرلیا؟ 6میچز کیسے ہار گئے؟ کوشش کر کے ہارے؟ اور اس کے بعد قہقہ لگایا۔
جس کے بعد شان مسعود نے کہا کہ ہمیں اس جیت کی ضرورت تھی، اس قوم کو جیت کی ضرورت تھی۔ جس پر رمیز راجہ نے اس شاٹ کا ذکر کیا جس پر اکثر شان مسعود آؤٹ ہوجاتے ہیں۔ رمیز راجہ نے کہا آپ اپنی شاٹ پر کنٹرول کر پائیں گے یا نہیں؟
یہ ویڈیو کلپ وائرل ہوا تو رمیز راجہ سماجی رابطے کی ویب سائٹ ایکس پر کرکٹ ماہرین اور صارفین کے نشانے پر آگئے اور انہیں خوب تنقید کا نشانہ بنایا گیا۔ ایک صارف نے ویڈیو پوسٹ کرتے ہوئے لکھا کہ رمیز راجہ کا رویہ انتہائی ناگوار ہے۔ یہ کس قسم کے سوالات پوچھ رہے ہیں؟ کوئی شرم نہیں آتی انہیں۔
This is absolute disgusting behavior from Ramiz Raja.
What kind of questions he is asking? No shame at all.pic.twitter.com/9RPyxvXpXT
— 𝙎𝙝𝙚𝙧𝙞 (@CallMeSheri1) October 26, 2024
اسپورٹس جرنلسٹ فیضان لاکھانی نے اسی حوالے سے پوسٹ کرتے ہوئے لکھا کہ جہاں ہر کوئی انگلینڈ کے خلاف سیریز جیتنے کے لیے پاکستان کی ناقابل یقین واپسی کا جشن منا رہا ہے، رمیز راجہ نے سرکاری ٹی وی پر قومی کپتان کو طعنے دینے کا انتخاب کیا۔ جب پاکستان تعریف کا مستحق تھا تو ایسی منفی سوچ لانے کی ضرورت نہیں تھی۔
While everyone celebrates Pakistan’s incredible comeback to win the series against England, Ramiz Raja chooses to taunt the national captain on official broadcast. There was no need to bring such negativity when Pakistan deserved all praise.pic.twitter.com/Px04020LoO
— Faizan Lakhani (@faizanlakhani) October 26, 2024
ایک اور صارف نے رمیز راجہ کو تنقید کا نشانہ بناتے ہوئے لکھا’ میں ہمیشہ کہتا ہوں کہ یہ شخص کمنٹری روم میں ایک مسخرہ ہے۔ زیرو کرکٹنگ سینس، کوئی اخلاقیات نہیں۔ پی سی بی کے چیئرمین بنتے ہی انہوں نے پاکستان کرکٹ کو تباہ کر دیا۔
I always say this man is a clown in commentary room. Zero cricketing sense, no ethics at all. He destroyed Pakistan cricket when he became chairman of PCB.
— Umar Sharif Paswal (@umarsharif015) October 26, 2024
جہاں صارفین نے رمیز راجہ کو ماضی میں غلط فیصلوں پر آڑے ہاتھوں لیا۔ وہیں شان مسعود کے ساتھ اپنائے گئے رویے کو ناقابل قبول قرار دیا۔ اسی حوالے سے ایک اورصارف نے لکھا رمیز راجہ کی باڈی لینگویج اور لہجہ دیکھیں۔ وہ واضح طور پر پاکستان کی سیریز جیتنے پر بہت ناخوش ہیں۔ یہ بندہ پاکستان کرکٹ کا سب سے بڑا دشمن ہے۔
Look at Ramiz Raja’s body language and tone – he’s clearly very unhappy that Pakistan won the series. Disgusting behavior.
This guy is the biggest enemy of Pakistan cricket.pic.twitter.com/Xkk21MMZLQ
— junaiz (@dhillow_) October 26, 2024
تاہم انگلینڈ کے خلاف ٹیسٹ سیریز میں کامیابی کے بعد پریس کانفرنس کرتے ہوئے شان مسعود نے کہا کہ اگر لوگ جیتنے پر بھی تنقید کر رہے ہیں تو افسوس ہو گا۔ طویل عرصے بعد جیت کی خوشی ہے، سیریز میں جیت کا کریڈٹ پاکستانیوں کو دینا چاہتا ہوں۔
