متحدہ عرب امارات کی ریاست دبئی میں جدید خود کار ٹریفک سگنلز سسٹم کی نمائش کی گئی ہے۔
امارات الیوم کے مطابق اسمارٹ ٹریفک کنٹرولنگ سسٹم کی نمائش میں سب سے زیادہ توجہ اسمارٹ ٹریفک سگنلز سسٹم پر دی گئی جو جدید اور انتہائی حساس کیمروں سے لیس ہوں گے، سگنلز خود کار گاڑیوں کو کنٹرول کرنے اور انہیں درست کمانڈ دینے کی صلاحیت کے حامل ہیں۔
نمائش میں یورپی یونین کے پویلین میں اسمارٹ گاڑیوں کے ماڈلز کو پیش کیا گیا جو آسٹریا میں استعمال کی جارہی ہیں، ان گاڑیوں میں سوار ہونے والوں کو یہ سہولت ہوتی ہے کہ وہ اپنی منزل کا تعین کریں اور محفوظ ڈرائیونگ کے جدید تجربے سے لطف اندوز ہوں۔
ناروے پویلین میں پبلک ٹرانسپورٹ کے لیے استعمال ہونے والی ایپلیکیشن کے طریقے کو واضح کیا گیا جس کے ذریعے عوامی ٹرانسپورٹ کے لیے ٹکٹوں کی خریداری و ادائیگی سے لے کربس اسٹاپس کا تعین شامل تھا۔
نمائش میں امریکی کمپنی کے ڈائریکٹر برائے مشرق وسطی و شمالی افریقی کے بتایا کہ ان کی کمپنی نے ایسے سمارٹ ٹریفک سگنلز متعارف کرائے ہیں جو انتہائی حساس نیٹ ورک سسٹم سے منسلک ہیں۔
ان سگنلز کی خوبی یہ ہے کہ ان میں نصب کیمرے اس سمت کا تعین کرتے ہیں جہاں ٹریفک ازدحام زیادہ ہوتا ہے اور اس جانب کے گرین سگنل کا دورانیہ خود کارانداز میں بڑھ جاتا ہے اس کا مقصد ازدحام کو کنٹرول کرنا ہے۔
