کراچی کی کورنگی سعودآباد پولیس نے اسٹریٹ کرائم کی متعدد وارداتوں میں ملوث ڈکیت گروہ کو گرفتار کرلیا ہے۔ ڈکیت گروہ نے کراچی کی سڑکوں پر 100 سے زائد لوٹ مار راہزنی اور ڈکیتی کی وارداتوں کا انکشاف کیا ہے۔ ملزمان اسلحے کے زور پر شہریوں سے لاکھوں روپے مالیت کے مہنگے موبائل فون اور موٹر سائیکلیں چھینتے تھے۔
ایس ایس پی کورنگی توحید رحمان کے مطابق ملزمان سے اسلحہ 2 پستول، گولیاں، چھینے ہوئے موبائل فون اور چھینی ہوئی 125 موٹر سائیکل برآمد کرلی گئی ہے۔ ملزمان چھینے ہوئے موبائل فون آن لائن ایپلیکیشن کے ذریعے سستے دام فروخت کردیتے تھے۔
توحید رحمان نے بتایا کہ ملزمان چھینی ہوئی موٹرسائیکلوں کے پارٹس کھول کر حب وندر کے علاقے میں بیچتے تھے۔ گرفتار ملزمان سے ملنے والی موٹر سائیکل سعیدآباد تھانہ بلدیہ کے علاقے سے چھینی گئی تھی۔ ملزمان کے دیگر مفرور ساتھیوں کی گرفتاری کے لیے چھاپے مارے جارہے ہیں۔
ایس ایس پی کورنگی کا کہنا تھا کہ ملزمان پر تھانہ سائٹ سپر ہائی وے، کلاکوٹ، سائٹ اے، جمشید کوارٹر، سعیدآباد اور بلدیہ میں مقدمات درج ہیں۔ ملزمان شاہراہ فیصل، ملیر پل، کالا پل، سعود آباد، الفلاح رفع عام اور شاہ فیصل میں وارداتیں کرتے تھے۔
گرفتار ملزمان کی شناخت اوسامہ، نعیم عباس اور عبدالمنان کے نام سے ہوئی۔ گرفتار ملزمان سے تفتیش کا عمل جاری ہے، ملزمان کے خلاف تھانہ سعودآباد میں مقدمہ درج کرلیا گیا ہے۔
