کراچی سپرہائی وے پر پولیس مقابلہ ہوا ہے، جہاں ڈاکوؤں کی فائرنگ سے ایک پولیس اہلکار شہید جبکہ دوسرا زخمی ہوگیا جبکہ وزیرداخلہ سندھ نے واقعے کی رپورٹ طلب کرلی۔
کراچی کے علاقے سائٹ سپرہائی وے گشت پر مامور پولیس اہلکاروں کو محمدی گوٹھ ندی کنارے ڈاکوؤں کے موجود ہونے کی اطلاع ملی، جس پر پولیس کو دیکھتے ہی ڈاکوؤں نے فائرنگ شروع کردی۔
ڈاکوؤں اور پولیس کے درمیان فائرنگ کے تبادلے میں 2 اہلکار زخمی ہوگئے، جن کی شناخت عادل پتافی اور چمن عباس کے نام سے ہوئی، دونوں زخمی اہلکاروں کو نجی اسپتال منتقل کیا گیا جہاں دوران علاج سپاہی چمن عباس شہید ہوگیا۔
شہید پولیس اہلکار نے وردی پر بلٹ پروف جیکٹ کا استعمال نہیں کیا جبکہ واقعے کے بعد ڈاکو موٹر سائیکل چھوڑ کر ندی کی طرف فرار ہوگئے۔
پولیس مقابلے کی سی سی ٹی وی فوٹیج میں ملزمان کو فائرنگ اور فرار ہوتے دیکھا جا سکتا ہے۔
واقعے کی اطلاع پر ایس ایس پی ایسٹ ڈاکٹر فرخ رضا موقع پر پہنچ گئے جبکہ پولیس نے علاقے میں ملزمان کی تلاش میں سرچ آپریشن شروع کردیا۔
شہید اہلکار کا تعلق پنجاب سے تھا، جو 2014 میں پولیس میں بھرتی ہوا جبکہ رشتہ داروں اور دوستوں کا کا کہنا ہے چمن عباس انتہائی پھرتیلا اور دلیر پولیس اہلکار تھا۔
دوسری جانب وزیرداخلہ سندھ ضیا لنجار نے واقعے کی تفصیلات ایس ایس پی ایسٹ سے طلب کرتے ہوئے ملزمان کے خلاف سخت کاروائی کے احکامات جاری کیے۔
رواں سال ڈاکووں کی فائرنگ سے شہید ہونے والے اہلکاروں کی تعداد 6 ہوگئی۔
