کراچی میں کارساز کے قریب ٹریفک حادثے کا مقدمہ بہادرآباد تھانے میں درج کر لیا گیا۔ پولیس کے مطابق مقدمہ متوفی عارف کے بھائی کی مدعیت میں بہادر آباد تھانے میں درج کیا گیا۔
پولیس کا کہنا تھا کہ حادثے کا سبب بننے والی گاڑی کی خاتون ڈرائیور بھی زخمی ہے، ملزمہ کو سر پر چوٹ لگی ہے، جناح اسپتال میں سی ٹی اسکین کیا جارہا ہے۔
پولیس کے مطابق ٹریفک حادثے میں باپ بیٹی جاں بحق جبکہ 5 افراد زخمی ہوگئے تھے، زخمیوں میں ایک کی حالت تشویشناک ہے۔
یاد رہے کہ گزشتہ روز کارساز روڈ پر افسوسناک حادثہ پیش آیا تھا، جہاں کار کی ٹکر سے خاتون سمیت 2 افراد جاں بحق جبکہ 4 زخمی ہوگئے تھے۔
خاتون ڈرائیور سے گاڑی بے قابو ہوکر دیگر گاڑیوں اور موٹرسائیکلوں سے ٹکرائی تھی، جس کے بعد پولیس نے حادثے کی ذمہ دار خاتون کو گرفتار کر لیا تھا، حادثے کے بعد کار سوار خاتون گاڑی چھوڑ کر فرار ہوگئی تھی۔
