الیکشن کمیشن آف پاکستان (ای سی پی) نے پنجاب اور خیبر پختونخوا کے آئی جیز سے انتخابات کیلئے سیکیورٹی صورتحال پر بریفنگ مانگ لی۔ شفاف الیکشن کیلئے جوڈیشل افسران کی خدمات حاصل کرنے کیلئے ہائی کورٹس سے بھی رجوع کر لیا گیا۔
قومی اسمبلی کی 83 نشستوں پر ضمنی جبکہ پنجاب اور خیبرپختونخوا اسمبلوں کے عام انتخابات کی تیاریوں پر غور کےلیے چیف الیکشن کمشنر سکندر سلطان راجہ کی زیر صدارت اجلاس میں ملکی صورتحال کے تناظر میں جائزہ لیا گیا۔
اجلاس میں طے پایا کہ دہشتگردی کے حالیہ واقعات کے بعد سیکیورٹی صورتحال کو مد نظر رکھنا ضروری ہے۔ پنجاب اور خیبر پختونخوا کے آئی جیز اور چیف سیکرٹریز سے سات فروری کو بریفنگ لی جائے گی۔
اجلاس میں شفاف انتخابات کا انعقاد یقینی بنانے کیلئے جوڈیشل افسران کی بطور آر اوز خدمات حاصل کرنے کا فیصلہ بھی ہوگیا۔ بتایا گیا کہ اس حوالے سے لاہور اور پشاور ہائیکورٹس کو خطوط ارسال کردیے گئے ہیں۔
انتخابی ضابطہ اخلاق طے کرنے کیلئے الیکشن کمیشن نے سیاسی جماعتوں کا اجلاس بھی نو فروری کو طلب کر رکھا ہے۔
