وفاقی وزیر داخلہ محسن قوی نے کہا ہے کہ ملک کی بدنامی کا باعث بننے والے کسی شخص کو بھی سفر کی اجازت نہیں دی جائے گی۔
وفاقی وزیرِ داخلہ و نارکوٹکس کنٹرول محسن نقوی نے لاہور ائیر پورٹ کا اچانک دورہ کیا، جہاں انہوں نے امیگریشن کے تمام عمل کا تفصیل سے جائزہ لیا۔
وزیرِ داخلہ نے امیگریشن کاونٹرز پر مسافروں کی ٹریول ہسٹری کو شناختی کارڈز اور پاسپورٹس سے منسلک کرنے کے جدید نظام کا معائنہ کیا اور اس تیز رفتار نظام کی کارکردگی پر ڈائریکٹر ایف آئی اے علی ضیاء اور ان کی ٹیم کی کارکردگی کو سراہا۔
محسن نقوی نے بیرونِ ملک روانہ ہونے والے اور بیرونِ ملک سے واپس آنے والے مسافروں سے ملاقات کی اور ان سے امیگریشن پراسیس کے بارے میں رائے لی۔
مسافروں نے مکمل اطمینان کا اظہار کرتے ہوئے کہا کہ صرف 2 منٹ میں امیگریشن کا عمل مکمل ہو گیا ہے، آپ کے دوروں سے امیگریشن کا نظام پہلے سے کہیں زیادہ بہتر ہوا ہے۔
وزیر داخلہ نے کہا کہ مکمل سفری دستاویزات رکھنے والے کسی مسافر کو نہ روکا جا رہا ہے نہ روکا جائے گا۔ نامکمل یا بوگس دستاویزات رکھنے والوں کو ہرگز سفر کی اجازت نہیں دی جائے گی۔
پاکستان کی عزت ہم سب کی عزت ہے، وطن کی بدنامی کا باعث بننے والے کسی شخص کو سفر کی اجازت نہیں دی جا سکتی، اس موقع پر ڈائریکٹر ایف آئی اے علی ضیاء سمیت دیگر متعلقہ حکام بھی موجود تھے۔
