واٹس ایپ ایک نئی فیچر پر کام کر رہا ہے جس کے ذریعے نامعلوم نمبروں سے آنے والے پیغامات براہِ راست چیٹ میں ظاہر ہونے کے بجائے ’ریکویسٹ‘ فولڈر میں آئیں گے۔
رپورٹ کے مطابق یہ فیچر نامعلوم پیغامات کو روکنے کے بجائے صرف ان کے ظاہر ہونے کا طریقہ تبدیل کرے گا۔ اگر صارف واٹس ایپ کی نئی سیٹنگ ’Who can message me‘ میں ‘Everyone’ کا انتخاب کرتا ہے تو اسے تمام افراد کے پیغامات موصول ہوتے رہیں گے، چاہے وہ نمبر فون بُک میں محفوظ نہ ہو۔
البتہ اگر صارف ’My Contacts‘ کا انتخاب کرے تو صرف محفوظ نمبروں سے آنے والی چیٹس براہِ راست ظاہر ہوں گی، جبکہ دیگر پیغامات انسٹاگرام کی طرح ایک الگ فولڈر ’ریکویسٹس‘ میں جائیں گے۔
اس فولڈر میں صارف پیغامات کو دیکھ کر فیصلہ کرسکے گا کہ وہ جواب دینا چاہتا ہے، پیغام حذف کرنا ہے، رپورٹ کرنی ہے یا رابطہ بلاک کرنا ہے۔ اگر صارف کسی پیغام کا جواب دیتا ہے تو وہ چیٹ خود بخود مین چیٹ لسٹ میں منتقل ہوجائے گی۔
واٹس ایپ کا یہ نیا فیچر فی الحال تیاری کے مراحل میں ہے اور جلد ہی اینڈرائیڈ صارفین کے لیے اپ ڈیٹ کے ذریعے دستیاب ہوگا۔
