ایشین انڈر 16 والی بال چیمپئن شپ کے سیمی فائنل میں پاکستان نے روایتی حریف بھارت کو عبرتناک شکست دے دی۔
پاکستان نے یکطرفہ مقابلے میں روایتی حریف بھارت کو 0-3 سے شکست دے کر ایشین انڈر 16 والی بال چیمپئین شپ کے فائنل میں جگہ بنالی۔ ٹائیٹل کے لیے پاکستان کا مقابلہ ہفتہ کو ایران سے ہوگا جس نے دوسرے سیمی فائنل میں جاپان کو مات دی۔
پاکستان جونیئر ٹیم نے کوئی سیٹ ہارے بغیر فائنل میں جگہ بنائی، پاکستان نے پہلا سیٹ 16-25 سے اپنے نام کیا، دوسرے سیٹ میں پاکستان نے 19-25 سے کامیابی پائی اور تیسرے اور فیصلہ کن سیٹ 12-25 سے جیت کر فتح کو گلے لگایا۔
پاکستان کی جانب سے جنید، فیضان، عرفان اور طلحہ نے عمدہ کھیل پیش کرکے اپنی ٹیم کی فتح میں اہم کردار ادا کیا، پاکستان ایونٹ میں شاندار پرفارمنس کی بدولت پہلے ہی عالمی انڈر27 والی چیمپین شپ 2926 میں شرکت کا حقدار بن چکا ہے۔
دریں اثنا دوسرے سیمی فائنل میں ایران نے جاپان کو 0-3 سے شکست دے دی، قبل ازیں ایونٹ میں ناقابل شکست پاکستان نے کوارٹر فائنل کی پوزیشن کے لیے ہونے والے مقابلے میں ایران کو 1-3 سے شکست دے کر فائنل فور میں جگہ بنائی تھی۔
پاکستان گروپ ڈی میں کوریا، سعودی عرب اور چائینیز تائپے کو قابو کرکے گروپ چیمپئن بنا اور انڈونیشیا کو مات دے کر سیمی فائنل میں جگہ بنائی۔
پاکستانی ٹیم اس ایونٹ میں اب تک ناقابلِ شکست رہی ہے اور ہر میچ میں مخالف ٹیموں کو بھرپور مقابلے کے بعد شکست سے دوچار کیا ہے۔
ایشین انڈر 16 والی بال چیمپئن شپ تھائی لینڈ میں جاری ہے جس میں ایشیا بھر کی نمایاں جونیئر ٹیمیں حصہ لے رہی ہیں۔
دریں اثنا وزیراعظم شہباز شریف نے ایشیئن انڈر 16 والی بال چیمپئن شپ کے فائنل کے لیے کوالیفائی کرنے پر پاکستانی ٹیم کو مبارکباد دی ہے۔
وزیراعظم نے اظہار مسرت کرتے ہوئے کہا کہ پاکستان اس پورے ٹورنامنٹ میں ناقابل شکست رہا، سیمی فائنل میں بھارت کو شکست دے کر فائنل کے لیے کوالیفائی کرنا انتہائی خوش آئند ہے۔
شہباز شریف نے کہا کہ پوری قوم کو اپنے نوجوانوں پر فخر ہے، ہماری دعا ہے کہ اللہ تعالیٰ فائنل میں پاکستانی ٹیم کو کامیاب کرے۔
